دورة لتعليم فن السموكس بالشرح والصور 2016

بسم الله نبدأ دورة الاسموكس وإن شاء الله حتكون فى الموضوع ده وكل ما حنزل باترون جديد حنضيفه فى أول مشاركة بإذن الله




مقدمة وتعريف بالاسموك

1-الاسموك هو فن رائع وسهل جدا بخطوات بسيطه ممكن تحصلى على عمل قيم وجميل جدا وممكن توفرى جدا فى حق الدرابيات لو عروسه او لو متجوزه تجددى بيتك بستاير وخداديات ودرابيات اى حاجه ممكن تدخلى فيها الاسموك

2-الاسموك انك تتنى القماش بشكل معين من الخلف عن طريق أستخدام الايرة والخيط فتحصلى على الشكل المطلوب من الامام

3-كل غرزه لها باترون خاص بيها وكل عمل سموك يحتاج إلى تخطيط محكم حتى يعطينا نتيجه صحيحة فيجب الاحتفاظ بالباترون لنقل المقاسات بحذافيرها

4-أفضل انواع القماش المستخدمة للأسموك هى الساتان بيدى نتيجه شيك جدا وبيزيد الغرزه جمال وممكن اى نوع قماش تانى لكن الستان هو ستان ماروكان  الستان الخشن اي ستان مغربي تجنبى القماش المنقوش علشان الغرز تبان

5-الاسموك ملهوش علاقه بالخياطه أو التطريز المتعارف عليه مجرد انك ترسمى الباترون وتمشى على الخطوات بس أكيد لو تعرفى خياطه على خفيف حيفرق فى الفينش بتاعك فى الشغل

6-يوجد بعض العلامات المستخدمه فى الباترون (جداول الاسموك)
x معناها نضم الاربع أطراف لبعض إلا إذا كانت مرقمه بترتيب معين
/ ضم الطرفين فقط
> ضم الثلاث اطراف عند رأس المثلث 
وده حنعرفه عملى فى الباترونات إن شاء الله

7-فى البدايه ممكن تستخدمى عينه تجربى فيها الغرز وتحددى اى غرزه عجبتك اكتر وابدأى الشغل على القماش الكبير 

8-بالنسبه للمقاسات فيه غرز بتخلى القماش يكش بالطول وفيه بالعرض بس فى المجمل الأسلم اننا نشترى الضعف يعنى نتعامل مع القماش انه حيكش النصف ولو كبير نفقصه ونداريه فى الخياطه او نستفيد منها فى اى عمل اخر 

2-الادوات المستخدمة


1-قماش والافضل يكون ستان وحنذكر المقاسات عن كل باترون بس خلى القاعده عندك الضعف

2-إبرة وفتلة من نفس لون القماش ومقص

3-مسطرة متر او 50 سم

4-أقلام جاف بلونين مختلفين بس نراعى انها متكنش بتطبع على وش القماش او مارك اللى بيكون عامل زى التباشيرة

5-كراسة مربعات صغيرة اللى بتستخدم فى تعلم باترونات الخياطه علشان تسجلى فيها الباترونات وتحتفظى بيها عندك

6-أختيارى استخدام كارتونه تعملى فيها المربعات جاهزة بدل التخطيط كل مرة
وممكن استخدام كاربون فاتح لشف الباترونات للى حيعملها جاهزة ويشيلها عنده